لوړ پوړی طالب چارواکی انس حقاني وايي، فقر او بې کاري دوی ته له تېر څخه په میراث پاتې ده او تمه شته، چې دا ستونزې به هم حل کړي.
ِّهغه د زمري میاشتې په ۲۴مه د طالبانو حکومت د بیا واکمنۍ د درېیمې کالیزې په مناسبت لیکلي چې د ملي حاکمیت اعاده، د سرتاسري امنیت او د واحد زعامت رامنځته کېدل، پر خپلې ملي بودجې د نظام چلول، د افغانانو تر منځ د اتحاد او وحدت بیارغونه، د قدرت د جزیرو په له منځه وړلو د دولت د حیثیت اعاده کول، د مخدراتو په مقابل کې پرېکنده موقف د دوی د نظام له مهمو لاسته راوړنو څخه دي.
د حقاني په خبره، د نورو کورونه د افغانانو دایمي کورونه نشي کېدلای او په کار ده، چې ټول افغانان په یووالي سره د خپل هېواد د ابادۍ لپاره کار وکړي.
د یادونې ده چې نن د اسد ۲۴مه، چې د اګست له ۱۴مې سره برابره ده، پر افغانستان د طالبانو حکومت د بیا واکمنۍ له درېیمې کالیزې سره برابره ده.
