شنبه, نوومبر 21, 2026
Homeافغانستانافغانستان کې نږدې ۳۰۰ روغتیايي مرکزونه تړل شوي؛ تر یو میلیون ډېرې...

افغانستان کې نږدې ۳۰۰ روغتیايي مرکزونه تړل شوي؛ تر یو میلیون ډېرې ښځې او نجونې اغېزمنې شوې دي

ملګرو ملتونو ویلي، په افغانستان کې د بشري مرستو د بودجې د کمښت له امله نږدې ۳۰۰ روغتیايي مرکزونه تړل شوي یا یې فعالیتونه ځنډول شوي، چې تر یو میلیون ډېرې ښځې او نجونې یې اغېزمنې کړې دي. دغه راز، ۳.۴ میلیونه ښځې او نجونې د پاکو اوبو او حفظ‌الصحې خدمتونو ته د لاسرسي له ستونزې سره مخ دي.

د ملګرو ملتونو د ښځو څانګې د بشري مرستو د برخې مشرې سوفیا کالټورپ ویلي، د ښځو پر طبي زده‌کړو بندیز او په ځینو سیمو کې پر نارینه روغتیايي کارکوونکو محدودیتونه، ښځو او نجونو ته د روغتیايي خدمتونو لاسرسی ستونزمن کړی دی.

نوموړې چې تازه له افغانستانه ستنه شوې، ویلي په کونړ کې یې له یوې ښځې سره لیدلي چې روغتیايي خدمتونو ته د نه لاسرسي له امله یې څو ځله سقط کړی دی. هغې خبرداری ورکړی چې په اوږدمهال کې د افغانستان ۲۲ میلیونه ښځې او نجونې روغتیايي خدمتونو ته له لاسرسي محرومېدای شي.

د ملګرو ملتونو د ښځو څانګې د معلوماتو له مخې، د جنسیت پر بنسټ د تاوتریخوالي د قربانیانو د ملاتړ څه باندې ۱۹۳ مرکزونه هم تړل شوي دي.

د دې ادارې ځانګړې استازې سوزان فرګوسن ویلي، په افغانستان کې د ښځو په مشرۍ د ۷۴ بنسټونو له ډلې نیمايي یې تمه لري چې د مرستو د کمښت له امله به د ۲۰۲۷ کال تر اپرېل پورې خپل فعالیتونه وځنډوي یا وتړي. د هغې په وینا، که دغه بنسټونه وتړل شي، تر ۴۲۷ زرو پورې ښځې به له اړینو خدمتونو د محرومېدو له خطر سره مخ شي.

ملګرو ملتونو همداراز ویلي، شاوخوا ۲.۶ میلیونه نجونې له منځنیو زده‌کړو محرومې دي او له ۲۰۲۴ کال راهیسې له ایران او پاکستانه څه باندې ۱.۵ میلیونه افغان ښځې او نجونې بېرته هېواد ته ستنې شوې دي.

د ملګرو ملتونو د ښځو څانګې له نړیوالو حکومتونو او مرستندویانو غوښتي چې له افغان ښځو او نجونو سره خپلې مرستې زیاتې کړي.

اړونده مطالب

LEAVE A REPLY

Please enter your comment!
Please enter your name here