د هلمند د کجکي ولسوالۍ په څلورو کلیو کې د څښاک پاکو اوبو څلور شبکې بشپړې او د سیمې اوسېدونکو ته وسپارل شوې چې ورسره ۸۷۱ کورنیو پاکو اوبو ته لاسرسی وموند.
د اوبو د دغو شبکو چارې د یونیسف په مالي ملاتړ د څه باندې ۲۳ میلیونه افغانیو په لګښت بشپړې شوې دي.
په لوی پله، ابدار، بيبانک او دهبابا کلیو کې د پروژې په ترڅ کې څلور څاهګانې او څلور د اوبو زېرمې جوړې شوې دي. همداراز د اوبو د لېږد لپاره ۱۵ زره او ۳۲۴ متره پایپونه غځول شوي دي.
په دې شبکه کې ۸۵ لمریزې تختې او ۴۲۲ نلکۍ هم نصب شوې دي، څو د یادو کلیو اوسېدونکو ته د پاکو اوبو د رسولو زمینه برابره شي.
