په بنګلهدېش کې د یوې ۱۳ کلنې نجلۍ د ژوند کیسې د ماشومانو د خوندیتوب او کم عمره ودونو په اړه پراخ بحثونه او اندېښنې راپورته کړې دي.
د راپورونو له مخې، انامیکا اختر جوی په ماشومتوب کې وروسته له هغې واده وکړ چې په ټولنیزو رسنیو کې له یوه مشر سړي سره اشنا شوه. نوموړې همداراز د خپل ماشومتوب له بشپړې تجربې وړاندې په ۱۳ کلنۍ کې مور شوه.
د معلوماتو له مخې، د ماشوم له زېږېدو وروسته جوی د خپل مېړه له کوره وایستل شوه او د هغې اووه میاشتنی زوی هم ترې واخیستل شو. دې حالت نوموړې اړ ایستله چې د خپل ماشوم د بېرته ترلاسه کولو لپاره د قانوني مرستې غوښتنه وکړي.
د هغې قضیه د ډاکا د حقوقي مرستو دفتر له لارې محکمې ته وړاندې شوه او له څېړنو وروسته محکمې پرېکړه وکړه چې ماشوم باید بېرته خپلې مور ته وسپارل شي.
د دې قضیې له خپرېدو وروسته، په ټولنیزو رسنیو کې ګڼو کسانو د ماشومانو د خوندیتوب، کم عمره ودونو او د ماشومانو د حقونو په اړه اندېښنې څرګندې کړې دي.
یو شمېر کاروونکو ویلي، ماشومان باید د زدهکړو، خوندي ژوند او عادي ماشومتوب حق ولري، نه دا چې له داسې مسؤلیتونو سره مخ شي چې د دوی له عمر پورته دي.
که څه هم محکمې د ماشوم د بېرته سپارلو پرېکړه کړې، خو د کم عمره واده د قانوني او ټولنیزو پایلو په اړه لا هم بحثونه روان دي.
