د افغانستان فوټبال فدراسیون شکرالله ابراهیمي د دغه فدراسیون د داورانو کمېټې د نوي مشر په توګه ټاکلی دی.
ابراهیمي له ۲۰۱۲ز کال راهیسې د فوټبال د داورۍ په برخه کې فعالیت لري او په ۲۰۱۸ز کال کې یې په سویلي کوریا کې د VAR ټکنالوژۍ اړوند روزنه هم بشپړه کړې ده.
د فوټبال فدراسیون وایي، نوموړی د فیفا نړیوال سندونه لري او تر دې وړاندې یې د کندهار فوټبال فدراسیون په بېلابېلو برخو کې د داورۍ، فوټسال، تخنیکي او اداري چارو مسوولیتونه ترسره کړي دي.
