د افغانستان د کرکټ بورډ مسوولين وايي چې د ملي لوبډلې مخکښ توپاچوونکی راشد خان د هېواد کورني کرکټ سیالیو «شپږیزه کرکټ لیګ» کې د ګډون لپاره افغانستان ته راغی.
د معلوماتو له مخې، راشد خان به د سپین غر لوبډلې په ترکیب کې ولوبېږي او ټاکل شوې ده چې په لومړۍ لوبه کې سبا د بست لوبډلې پر وړاندې میدان ته ښکته شي.
د شپږیزه کرکټ لیګ سیالۍ د خوست ولایت په کوربهتوب څو ورځې وړاندې د بند امیر، سپین غر، مس عینک، آمو او بست لوبډلو په ګډون پیل شوې دي.
د يادونې وړ ده چې شپږیزه کرکټ لیګ د افغانستان د کورني کرکټ له مهمو تجارتي او رقابتي سیالیو څخه دی، چې د ملي لوبغاړو ترڅنګ پکې ګڼ ځوان استعدادونه هم خپل مهارتونه څرګندوي.
