افغان ابدالیانو نن د درې اړخیزې لوبلړۍ په خپله وروستۍ لوبه کې د سریلانکا له الف لوبډلې د ۱۰۳ منډو په توپیر ستره ماتې وخوړه.
د دغې لوبې پچه هم افغان ابدالیانو ګټلې وه او سیالې لوبډلې ته یې د توپ وهنې بلنه ورکړه.
د سریلانکا ااف لوبډلې په لومړۍ پاڼۍ کې په ۵۰ اوورونو کې د ۸ لوبغاړو په زیان افغانستان ته د ۳۲۳ منډو هدف ورکړ.
د افغانستان لپاره توپ اچوونه کې فریدون داوودزي څلور، فرمان الله صافي درې او محمد ابراهیم یو لوبغاړی وسوځاوه.
په دویمه پاڼۍ کې د هدف په تعقیب افغان ابدالیانو په پیلیزو اوورونو کې دوه وېکټې ډېر زر له لاسه ورکړې، یوازې حسن عیسی خېل توپ وهنې ته دوام ورکړ چې د نوموړي د ۷۴، فرمان الله صافي ۴۳ او بهیر شاه محبوب ۳۵ ډېرو منډو پر مټ افغانستان یوازې ۲۱۹ منډې وکړې او ټولې وېکټې یې ولوېدې.
په ټوله کې د سریلانکا په کوربتوب په دې لوبلړۍ کې افغان ابدالیانو یوه لوبه د هند پر وړاندې وګټله او درې یې وبایللې.
په همدې حال کې د لوبلړۍ پای لوبه د جون په ۲۱مه د هند او سریلانکا الف لوبډلو ترمنځ ترسره کیږي.
