له بېلابېلو اسلامي هېوادونو څه باندې یو نیم میلیون حاجیان د حج د مناسکو د ادا کولو لپاره سعودي عربستان ته رسېدلي او د حج مراسم یې پیل کړي دي.
حاجیان د منا سیمې ته تر رسېدو وروسته د عرفات د ورځې لپاره چمتووالی نیسي، چې د حج تر ټولو مهم رکن ګڼل کېږي.
د سعودي چارواکو په وینا، د حاجیانو د اسانتیا او امنیت لپاره پراخ تدابیر نیول شوي او د ترانسپورټ، روغتیا او بیړنیو خدماتو ځانګړي پلانونه عملي شوي دي.
بل لور ته، د سعودي هوا پېژندنې ادارې د سختې ګرمۍ خبرداری ورکړی او ویلي یې دي چې د تودوخې درجه ښايي ۴۷ سانتي ګرادو ته لوړه شي.
چارواکو له حاجیانو غوښتي چې د لمر له مستقیمو وړانګو ځان وساتي، کافي اوبه وڅښي او روغتیايي سپارښتنې جدي تعقیب کړي.
د يادونې ده، چې سږکال ٣٠زره افغان حاجیان هم د اریانا افغان او کام ایر هوايي شرکتونو په ٩٧ الوتنو کې سعودي عربستان ته لېږدول شوي دي.
