د طالبانو د حکومت د بهرنیو چارو وزارت نن د بلوچستان په کوټه ښار کې د اورګاډي په کرښه بمي چاودنه وغندله.
دغې وزارت په خبرپاڼه کې ویلي، د بلوچستان په کوټه ښار کې په عامه سفر کوونکو وروستۍ چادونه چې له امله یې ګڼ شمېر کسانو ژوند له لاسه ورکړ او ټپیان شول غندي، د ملکي وګړو مرګ ژوبله که د هر چا له لوري او په هره بڼه وي، د غندني وړ ده.
د طالبانو د حکومت د بهرنیو چارو وزارت همداراز د قربانیانو کورنیو ته تسلیت ویلی او خپله خواخوږي یې ورسره څرګنده کړې.
نن ماسپښین د پاکستان بلوچستان ایالت په کوټه ښار کې د اورګاډي پر کرښه بمي چاودنه وشوه چې په کې ۲۳ تنه ووژل شوي او له ۷۰ ډېر ټپیان شوي دي.
