د طالبانو حکومت د ریاستالوزرا اقتصادي مرستیال ملا عبدالغني برادر د افغانستان لپاره د بریتانیا له ځانګړي استازي ریچارډ لینډزي سره په خپل دفتر کې لیدنه کړې ده.
د غونډې پر مهال د افغانستان او نړیوالې ټولنې ترمنځ د همغږۍ او همکاریو پر پیاوړتیا او همدارنګه د بریتانیا د بشري مرستو پر دوام خبرې شوې دي.
ملا برادر ویلي چې د افغانستان اقتصادي وضعیت د پخوا په پرتله ښه شوی او له سیمې او ګاونډیو هېوادونو سره اقتصادي اړیکې پراخې شوې دي.
بل لور ته، د بریتانیا ځانګړي استازي له هغو افغانانو سره خواخوږي څرګنده کړې چې د پاکستان د وروستیو بریدونو له امله زیانمن شوي، او ټینګار یې کړی چې د بریتانیا حکومت او خلک به له افغانانو سره خپلو مرستو ته دوام ورکړي.
