د طالبانو حکومت د کابل ښاروالۍ په ناقانونه توګه د عمرګلستان ښارګوټي یو شمېر کورونه مهرلاک کړي او د دغه ښارګوټي له اوسېدونکو یې غوښتي چې خپل کورونه پرېږدي.
د عمرګلستان ښارګوټي اوسېدونکي وایي چې دوی د جمهوري حکومت د ښار جوړولو وزارت، کابل ښاروالۍ او د املاکو اړوند ټول رسمي اسناد په لاس کې لري او ټینګار کوي چې هېڅکله به خپل کورونه پرې نه ږدي.
دوی زیاتوي، که څه هم یاد ښارګوټی دولتي ملکیت ګڼل کېږي؛ خو اپارتمانونه یې په خپلو شخصي پیسو اخیستي دي او د قانون له مخې پرته له مناسب جبران څخه هېڅ اداره حق نه لري چې دوی له خپلو قانوني کورونو وباسي.
د اوسېدونکو په وینا، پر ځای د دې چې ښاروالۍ او ځانګړې محکمې دوی ته د ستونزو د حل اسانتیاوې برابرې کړي، برعکس یې ستونزې زیاتې کړې دي او د ګڼو پانګوالو د اندېښنو سبب ګرځېدلي دي.
د یادونې ده چې په دغه شهرک کې اته بلاکونه جوړ شوي چې په دې کې ۶۱۶ کورنۍ استوګنې دي.
