د پخواني ولسمشر محمد اشرف غني د ویاند مرستیال شاه حسین مرتضوي ویلي چې ځینې سیاستوال لا هم د قومي کارت له لارې سیاسي ګټې ترلاسه کوي او د قومونو ترمنځ د نفاق او دښمنۍ فضا رامنځته کوي.
هغه زیاته کړې چې په تېرو څو لسیزو کې یو بشپړ نسل د همدې ډول سیاسي لوبو قرباني شوی او دا تګلارې د هېواد د ثبات پر وړاندې جدي خنډ ګرځېدلې دي.
مرتضوي ټینګار کړی چې اوس د عامه پوهاوي له زیاتېدو سره خلک نور د دې ډول لوبو ښکار نه کېږي او هېڅوک نشي کولای د یوه قوم د استازیتوب ادعا وکړي.
د هغه په وینا، د خلکو لپاره ګډ ژوند، ملي یووالی، متقابل درناوی، او عدالت بنسټیز ارزښتونه دي، او د خلکو لاره اوس د قومي مشرانو له تګلارې بېله شوې ده.
