د افغانستان پخواني ولسمشر حامد کرزي د اصف علي زرداري د وروستیو څرګندونو په غبرګون کې ویلي چې د ګندهارا تمدن او یو شمېر کلتوري میراثونه د تاریخي شواهدو له مخې د یوې پراخې سیمې برخه دي چې د لرغوني آریانا له تمدن سره تړاو لري.
کرزي ویلي چې ګندهارا تاریخ د بامیان له سیمو نیولې تر د سند حوزې پورې غځېدلې و او د هغه په وینا د دې تمدن تاریخي ریښې د اوسني افغانستان له کلتوري میراث سره نږدې تړاو لري.
هغه همداراز د آدمخان او درخانۍ د کیسې او د رباب د هنر په اړه ویلي چې دا د افغانستان د بډایه فرهنګي میراث برخه ده، چې په بېلابېلو تاریخي سرچینو او ادبي آثارو کې یاد شوي دي.
کرزي زیاته کړې چې رباب د افغانستان د موسیقۍ یوه مهمه او پېژندل شوې آله ده چې د کابل رباب په نوم نړیوال شهرت لري، او د ملګرو ملتونو د کلتوري ادارې له لوري هم د افغانستان د ناملموسو فرهنګي میراثونو په توګه ثبت شوې ده.
هغه ټینګار کړی چې فرهنګي میراثونه د سیمې د خلکو ګډ تاریخ څرګندوي، او باید د شخړو پر ځای د ملتونو ترمنځ د نږدېوالي او ګډ فرهنګي اړیکو لپاره وکارول شي.
دا په داسې حال کې ده چې د پاکستان ولسمشر اصف علي زرداري په وروستیو څرګندونو کې ویلي چې د ګندهارا تمدن د پاکستان د ملي هویت برخه ده او دا تمدن د پاکستان له تاریخي میراث سره تړاو لري.
هغه همداراز ویلي چې د آدمخان او درخانۍ کیسه او د رباب کلتوري هنر د پاکستان د ناملموس فرهنګي میراث برخه ګڼل کېږي او د دغه هېواد له تاریخي هویت سره تړلي دي.
