د طالبانو د حکومت بندي مبلغ او د کابل امنیه قومندانۍ پخواني ویاند «جنرال» مبین پر افغانستان د پاکستان بریدونو ته په غبرګون کې ویلي، که څه هم افغانستان د پرمختللې پوځي ټکنالوژۍ له کمښت سره مخ دی او د فوري ځواب وس نه لري؛ خو ټینګار یې کړی چې د پاکستاني هوايي بریدونو ځواب به ورکول کېږي، حتی که دا کار درنه ځاني بیه هم ولري.
هغه په طنزي ډول د ډیپلوماتیکو اړیکو یادونه هم کړې او ویلي یې دي چې د سفیر احضارول داسې ښکاري لکه له یو پخواني ملګري سره د احوال پوښتنه، نه دا چې د یوه جدي سرغړونې په اړه اعتراض.
نوموړي زیاته کړې، چې په روژه کې د ملکي وګړو، په ځانګړي ډول ماشومانو، په نښه کول وحشیانه عمل دی.
هغه دغه راز د لاس د کړۍ یو عکس خپور کړی او د ذبیح الله مجاهد هغه څرګندونو ته یې اشاره کړې چې ویلي یې وو،«پر افغانستان بریدونه د پاکستاني پوځ د ځانګړیو کړیو لاس دی» هغه کړۍ همدا ده.
