د پاکستان او افغانستان د ګډې سوداګرۍ او صنایعو خونې له دواړو هېوادونو غوښتي چې د سوداګریزو لارو پر سر ولاړ خنډونه ژر تر ژره لرې کړي او د لس زرو څخه د زیاتو بند پاتې کانتینرونو د یوځل ازاد تګ راتګ اجازه ورکړي.
د پاکستاني رسنیو د راپورونو له مخې، دغه کانتینرونه تر سلو ورځو زیات وخت د سرحدي لارو د تړل کېدو له امله بند پاتې دي.
یادې خونې خبرداری ورکړی چې د سوداګرۍ دوامدار ځنډ د پاکستان او افغانستان سوداګرو ته درانه مالي زیانونه اړولي او میلیونونه ډالر تاوان یې رامنځته کړی دی.
د خونې په وینا، که د دواړو هېوادونو ترمنځ سوداګریز بهیر بېرته عادي نه شي؛ نو دا به نه یوازې پر سوداګرو، بلکې د دواړو هېوادونو پر اقتصادونو هم منفي اغېزې ولري، او له چارواکو یې غوښتنه کړې چې په بیړني ډول عملي ګامونه واخلي.
