د ننګرهار پخواني والي ضیاءالحق امرخېل ویلي چې افغانان باید له تاریخي تجربو زده کړه وکړي، ځکه د هغه په باور پاکستان په تېرو پنځوسو کلونو کې تل د یوې ډلې تر هغه وخته ملاتړ کړی چې د کابل پر موجود نظام د فشار وسیله ګرځېدلې وي؛ خو کله چې هماغه ډلې واک ته رسېدلې، اسلاماباد د هغوی د کمزوري کولو یا پرځولو هڅې پیل کړي دي.
امرخېل ټینګار کوي چې پاکستان په افغانستان کې د کومې ځانګړې ډلې دایمي واک ته رسېدل نه غواړي او د هغه په وینا، اسلاماباد خپله ستره موخه په دې کې ویني چې افغانستان تل د بېثباتۍ له ګواښ سره مخ وي.
نوموړي زیاته کړې:«پاکستان یو ستر هدف لري: په افغانستان کې د هېڅ یوې ډلې حکومت نه غواړي. د دوی دښمني له دې خاورې او ملت سره ده. نور باید په دې ښه پوه شو.»
