د کرسک سیمې څخه ایستل شوي ملکي وګړي د روسیې سویلي ښارونو ته لیږدول شوي دي.
د روسیې د بیړنیو حالاتو د وزارت د چارواکو په وینا، د اوکراین له خوا د ناڅاپي برید له وېرې، ایستل شوې ډلې د ساراتوف، سمارا او تامبوف سیمو ته تللې دي.
بل لورته د اوکراین ولسمشر ولادیمیر زلنسکي وایي، په کورسک سیمه یې ځکه حملې کړې چې دا سیمه د روسیې پر وړاندې د یو حایل په توګه وکارول شي.
که څه هم له څو ورځو راهیسې په کورسک سیمه کې درنه جګړه پیل شوې؛ خو دا لومړی ځل دی چې زلنسکي د دغې جګړې هدف په ګوته کوي.
اوکرایني ځواکونو په دغه سیمه کې یو مهم پل نړولی او یو بل کلیدي پل ته هم نږدې شوي دي.
اسوشټیډ پریس ویلي، چې د دغه پل له نړېدو وروسته د روسیي ځواکونو ملاتړ کمزوری شوی دی.
