په افغانستان کې د ملګرو ملتونو مرستندویه ماموریت یا یوناما ویلي چې د افغانستان او پاکستان د ځواکونو ترمنځ وروستیو سرحدي نښتو کې ملکي وګړو ته درنه مرګژوبله اوښتې ده.
یاد ماموریت نن جمعه په یوه خبرپاڼه کې ویلي چې د فبرورۍ له ۲۶مې څخه د مارچ تر ۵مې پورې د مخامخ جګړو او هوايي بریدونو له امله لږ تر لږه ۵۶ ملکي کسان وژل شوي او ۱۲۹ نور ټپیان شوي دي.
د اعلامیې له مخې، د قربانیانو شاوخوا ۵۵ سلنه ښځې او ماشومان دي چې دا چاره د ملکي وګړو د خوندیتوب په اړه جدي اندېښنې راپورته کوي.
یوناما له دواړو لورو څخه غوښتي چې د نړیوالو بشري قوانینو درناوی وکړي او د ملکي وګړو ساتنې ته جدي پام وکړي.
