د حزب اسلامي ګوند مشر ګلبدین حکمتیار د امریکا د ولسمشر ډونالډ ټرمپ وروستیو څرګندونو ته په غبرګون کې ویلي چې ټرمپ د بګرام هوايي اډې د بیا نیولو په فکر کې دی؛ خو دا اقدام به د امریکا د زوال سبب شي.
هغه زیاته کړې چې د طالبانو حکومت د بګرام په اړه د هر ډول معاملې خبرې رد کړي دي؛ خو ټرمپ ګواښ کړی که بګرام په واک کې ور نه کړل شي، بدې پایلې به ولري.
حکمتیار امریکا ته خبرداری ورکړی چې د افغانستان د خلکو د مقاومت په وړاندې به بریالي نه شي.
هغه ویلي چې امریکا د ترهګرۍ د مقابلې تر نامه لاندې درواغ وايي او په حقیقت کې د افغانستان د بیا نیولو هڅه کوي.
نوموړي ټینګار کړی چې افغانان به د هر ډول یرغل پر وړاندې جګړه وکړي او هیڅکله به د خپلو هېوادوالو د ازادۍ او خپلواکۍ څخه تېر نه شي.
