د وینزویلا لنډمهالې ولسمشرې ډلسي روډریګز ویلي، چې د دغه هېواد خلک غواړي په خپل هېواد کې له بهرنیو فشارونو او ګواښونو پرته ارام ژوند ولري.
نوموړې ټینګار کړی چې د وینزویلا ولس د خپل برخلیک د ټاکلو حق لري او باید د نورو هېوادونو له لاسوهنې خوندي پاتې شي.
روډریګز په خپلو څرګندونو کې ویلي، د وینزویلا حکومت چمتو دی چې له متحده ایالاتو سره د ګډو ګټو پر بنسټ یو ګډ چوکاټ یا اجنډا رامنځته کړي.
د هغې په وینا، دا بلنه د متقابل درناوي، ملي حاکمیت او سیاسي تفاهم پر اصولو ولاړه ده.
هغې زیاته کړې چې د وینزویلا حکومت غواړي له امریکا سره اړیکو ته لومړیتوب ورکړي او هڅه کوي د اوږدې مودې ترینګلتیا پر ځای د خبرو، تفاهم او ډیپلوماسۍ له لارې ستونزې هوارې کړي.
