یو شمېر افغانانو شکایت کړی چې د اسلاماباد په هوایي ډګر کې، سره له دې چې قانوني ویزې او بشپړ اسناد یې لرل، د کابل پر لور د سفر اجازه نه ده ورکړل شوې او الوتنه یې لغوه شوې ده.
د راپورونو له مخې، هر مسافر شاوخوا ۵۸ زره پاکستانۍ کلدارې مالي زیان لیدلی.
پاکستاني خبریال طاهر خان ویلي، چې لږ تر لږه ۳۲ افغان مسافرو د کامایر الوتکې ته د ختلو اجازه نه ده ترلاسه کړې.
نوموړي د پاکستان له چارواکو غوښتي چې دا موضوع وڅېړي.
دا ستونزه په داسې حال کې رامنځته شوې چې د افغانستان او پاکستان ځمکنۍ لارې تړلې دي او افغانان یوازې د هوایي لارې له سختو محدودیتونو سره تګ راتګ کولی شي.
