د طالبانو د زندانونو چارو د سمون ادارې مشر محمد یوسف مستري وایي د تیرې ولسي جرګې غړی الله ګل مجاهد په پلچرخي زندان کې توقیف شوی دی او لا تراوسه محکمې پرې کومه پریکړه نه ده کړې.
ښاغلي مستري طلوع نیوز سره په ځانګړې مرکه پرته له دې چې د الله ګل مجاهد د جرم په اړه خبرې وکړي وویل که چیرې پرې جرم ثابت شي د خلکو پر وړاندې به اعدام شي.
دغه طالب چارواکی وایي چې د ټول افغانستان په زندانونو کې محکوم شوي دولس زره بندیان دي چې له دې ډلې یې زر تنه میرمنې دي.
