د امریکا د بهرنیو چارو وزیر مارکو روبیو ویلي چې د ایران په مشرۍ کې ځینې درزونه شتون لري.
هغه دا څرګندونې د امریکا د ولسمشر ډونالډ ټرمپ د هغو خبرو په غبرګون کې کړې چې په ایران کې یې د نوې او منطقي رژیم سره د خبرو یادونه کړې وه.
روبیو ویلي چې ځینې کسان په ایران کې په پټه سمې خبرې کوي او له امریکا سره اړیکې لري، خو هغه د نومونو یادونه نه ده کړې، ځکه چې دا کار ښايي د هغوی لپاره په ایران کې ستونزې جوړې کړي.
هغه ټینګار کړی چې لا هم څرګنده نه ده چې دغه افراد به واک ته ورسېږي او که د خپلو ژمنو د عملي کولو توان لري؛ خو امریکا به وضعیت ازمويي.
روبیو زیاته کړې چې د ټرمپ څرګندونې ښيي چې هغه، سره له ټولو ګواښونو، بیا هم د ډیپلوماسي ملاتړ کوي.
