د طالبانو حکومت او د پاکستان د بهرنیو چارو وزارتونو ترمنځ د سیاسي مشورو لومړۍ غونډه د اسلاماباد په کوربتوب ترسره شوه.
د طالبانو حکومت د بهرنیو چارو وزارت د عامه اړیکو رییس ضیا احمد تکل ویلي، دواړو لورو د سیاست، سوداګرۍ، ټرانزیټ، او سیمهییزو همکاریو پر مهمو مسایلو خبرې وکړې.
په غونډه کې د پاکستان په زندانونو کې د افغان بندیانو د ستونزو، افغان ناروغانو ته د درملنې لپاره د ویزو، او سوداګرو ته د اسانتیاوو پر چمتو کولو ټینګار شوی دی.
دواړو خواوو ژمنه کړې چې د شته ستونزو د حل او د اړیکو د پیاوړتیا لپاره به خبرې دوام پیدا کړي، او د سیمې د ثبات او پرمختګ لپاره به ګډ امنیتي همغږي پراخوي.
