د کندهار د سوداګرۍ او پانګونې خونې اعلان کړی چې له پاکستان سره د سوداګریزو لارو تر تړل کېدو وروسته هم له دې ولایت څخه د لسګونو میلیونو ډالرو په ارزښت د انارو صادرات دوام لري.
د یادې خونې د معلوماتو له مخې، په تېرو څو اوونیو کې نږدې ۲۳ زره ټنه کندهاري انار چې ارزښت یې شاوخوا ۱۰ میلیونه ډالر اټکل شوی، بهرنیو بازارونو ته لېږدول شوي دي.
دوی زیاتوي چې دا محموله د څو مسیرونو له لارې هند، مالیزیا، قزاقستان، روسیې او ازبکستان ته صادر شوې ده.
د سوداګرۍ خونې چارواکي وايي، که څه هم د پاکستان لارې تړلي پاتې دي، خو سوداګر هڅه کوي چې د بدیلو لارو له لارې د صادراتو بهیر ځنډمن نه شي.
