د کرېکټ نړۍوالې شورا (ICC) ویلي، چې د افغانستان د ښځینه کرېکټ لوبډلې د ملاتړ لپاره یوه ځانګړې کاري ډله جوړوي.
یادې شورا ویلي، چې دغه کاري ډله به د هند، انګلستان او اسټرالیا له کرېکټ بورډونو سره په همغږۍ کار کوي.
د دې شورا وینا، د دغې ډلې له لارې به یو ځانګړی مالي صندوق هم رامنځته شي، څو د افغان ښځینه لوبغاړو لپاره مستقیم مالي ملاتړ برابر شي.
د کرکټ نړیوالې شورا زیاته کړې، چې د مالي مرستې ترڅنګ د روزونکو لپاره ټریننګونه، د نړیوالو اسانتیاوو کارول، او نور مسلکي پرمختیايي پروګرامونه هم پکې شامل وي.
د یادونې وړ ده چې د افغانستان د ښځینه کرېکټ لوبډلې غړي دا مهال له هېواده بهر ژوند کوي.
