د طالبانو حکومت د کانونو وزارت څخه یوې باوري سرچینې حماسه میډیا ته ویلي، چې ددې وزارت د امو دریا د نفتي حوزې رئیس او حقوقي سلاکار مفتي عبدالصمد، او یو بل سلاکار مطیعالله حقاني د فساد په تور نیول شوي دي.
سرچینې ویلي، مفتي عبدالصمد شاوخوا لس ورځې وړاندې نیول شوی؛ خو د مطیعالله حقاني د نیول کېدو په اړه ضد او نقیض راپورونه موجود دي.
مطیعالله حقاني تر دې وړاندې هم د یوې قضیې په تړاو د شاوخوا اووه لکه امریکایي ډالرو د بډې اخیستو په تور تورن شوی و.
حماسه میډیا هڅه وکړه چې په دې تړاو د طالبانو حکومت د استخباراتو ادارې څخه د اړوندې موضوع په تړاو جزیات واخلي؛ خو د استخباراتي ادارو سرچینو ویلي، چې یاد کسان دا مهال د دوی په بند کې نه دي او د نیولو په اړه یې رسمي تأیید نه شته.
