د طالبانو حکومت د ټولګټو چارو وزارت وایي چې د هېواد د اوسپنې پټلۍ له لارې د توکو د لېږد بهیر په عادي ډول روان دی او تر اوسه د انتقالاتو په برخه کې کوم خنډ نه دی رامنځته شوی.
یاد وزارت په خپره شوې خبرپاڼه کې ویلي، چې د هېواد د اوسپنې پټلۍ د څلورو بندرونو له لارې د مالونو انتقالات منظم دوام لري.
د خبرپاڼې له مخې، د ۱۴۰۴ لمریز کال د کب له ۸مې نېټې څخه تر ۱۲مې پورې د اوسپنې پټلۍ له لارې ټولټال ۱۲۷ زره او ۶۵۰ مټریک ټنه توکي لېږدول شوي دي.
د وزارت په وینا، د رېل پټلۍ له لارې د توکو لېږد د سوداګرۍ د اسانتیا او اقتصادي فعالیتونو د پیاوړتیا لپاره مهم رول لري.
