د طالبانو حکومت د اقتصاد وزارت وايي، د ختیځو ولایتونو د وروستۍ زلزلې د قربانیانو د عاجلو مرستو د چټکتیا لپاره یې له ملګرو ملتونو اړوندو ادارو سره غونډه کړې ده.
د طالبانو حکومت د اقتصاد وزیر دین محمد حنیف له دغو ادارو غوښتي چې بشري مرستې زیاتې او دوامداره کړي.
د ملګرو ملتونو استازو ژمنه کړې چې له نړیوالو بنسټونو څخه د لا ډېرو مرستو د جذب لپاره به کار وکړي.
د طالبانو حکومت د معلوماتو له مخې، یوازې په کونړ کې د وژل شویو شمېر ۱۴۱۱ ته او د ټپیانو شمېر ۳۱۲۴ ته رسېدلی، او شاوخوا ۵۴۱۲ کورونه نړېدلي دي.
