د شانګهای همکارۍ سازمان اړوند د ترهګرۍ ضد سیمهییز جوړښت په خپلې وروستۍ غونډه کې خبرداری ورکړی چې په افغانستان کې د وسلهوالو ډلو فعالیتونه د پخوا په پرتله زیات شوي او دا وضعیت د سیمې امنیت ته جدي ګواښ بلل کېږي.
دغه غونډه د ازبکستان په پلازمېنه تاشکند کې ترسره شوه، چې پکې د غړو هېوادونو استازو د افراطي او بېلتونپالو ډلو د پیاوړتیا په اړه اندېښنه څرګنده کړه.
د غونډې ګډونوالو وویل چې ځینې ډلې نه یوازې په افغانستان، بلکې په سوریه کې هم خپلې جګړهییزې وړتیاوې لوړې کړې دي.
د سرچینو په وینا، د شانګهای همکارۍ سازمان چارواکو ټینګار وکړ چې د ګاونډیو هېوادونو پر وړاندې د احتمالي ګواښونو د مخنیوي لپاره باید ګډ استخباراتي همغږي او عملي اقدامات زیات شي.
