د سوریې دفاع وزارت په یوه اعلامیه کې ویلي، چې د حزبالله جنګیالیو له لبنانه د حمص ولایت قصیر سیمې پر لور پنځه هاوان مرمۍ توغولي، چې د سوریې ځواکونو له خوا ځواب ورکړل شو.
په دې اعلامیه کې ویل شوي، چې د لبنان د پوځ د غوښتنې له مخې، د سوریې د توپخانې ځواکونه هغو ځایونو ته چې له هغوی څخه مرمۍ توغول شوې وې، بریدونه یې درولي دي.
د سوریې دفاع وزارت ټینګار کړی، چې د هغو ډلو د فعالیتونو څارنه چې د قصیر پر لور یې مرمۍ توغولې، د لبنان د پوځ مسؤلیت دی او له همدې امله د سوریې توپخانه بنده شوې ده.
په ورته وخت کې د لبنان ملي خبري آژانس خبر ورکړی، چې د سوریې له پولې سره نږدې د «حوش السید علی» په سیمه کې یوه کرنیزه ځمکه باندې د یوه ډرون برید کې اته سوریایي کډوال ټپیان شوي دي.
د راپور له مخې، د لبنان سره صلیب دا ټپیان روغتون ته لېږدولي دي.
