د روغتیا نړیوال سازمان د امریکا له لوري له دې ادارې د وتلو پرېکړه د اندېښنې وړ بللې او ویلي یې دي چې دا ګام به د نړیوالو روغتیايي هڅو لپاره لویه ضربه وي.
سازمان ټینګار کړی چې د امریکا پرېکړه کولای شي د ناروغیو پر وړاندې نړیواله همغږي کمزورې کړي.
امریکا ویلي چې نور نه غواړي د یوې نړیوالې ادارې له لارې کار وکړي او پر ځای به یې له هېوادونو سره د ناروغیو د څار او عامه روغتیا په برخه کې مستقیمه همکاري وکړي.
د روغتیا نړیوال سازمان یادونه کړې چې واشنګټن د دې بنسټ له مهمو غړو څخه و او د خطرناکو ناروغیو پر ضد په مبارزه کې یې مهمه ونډه لرله، خو سره له دې به دا اداره له نورو هېوادونو سره خپلو فعالیتونو ته دوام ورکړي.
