په کابل کې د روسیې سفیر دیمیتري ژیرنوف، د طالبانو حکومت د بهرنیو چارو سرپرست وزیر، امیرخان متقي ته په رسمي ډول خبر ورکړی چې روسیې طالبان د ترهګرو ډلو له نوملړ څخه لرې کړي دي.
د طالبانو د بهرنیو چارو وزارت د ویاند مرستیال، ضیا احمد تکل وایي، دواړو لوریو د روسیې د سترې محکمې دا پرېکړه تاریخي بللې او ویلي یې دي چې دا ګام به د مسکو او کابل ترمنځ د سیاسي او اقتصادي همکاریو په پراخېدو کې مهم رول ولوبوي.
د یادونې ده چې د روسیې سترې محکمې نن د دغه هېواد د لویې څارنوالۍ غوښتنه ومنله او طالبان یې د ترهګرو سازمانونو له لیست څخه موقتاً وایستل.
د روسیې لویې څارنوالۍ ویلي، چې دا پرېکړه د هغو قانوني بدلونونو پر بنسټ شوې چې تېر کال د ترهګرۍ ضد او اداري قضايي قانون کې راوستل شوي دي.
