د امریکا پخوانی ولسمشر جو بایډن د پرستات په یو چټک خپرېدونکي سرطان اخته شوی چې هډوکو ته یې هم رسېدلی دی.
د ۸۲ کلن بایډن د دفتر له خوا په خپره شوې اعلامیه کې ویل شوي چې د نوموړي د جمعې په ورځ د پرستات سرطان مثبت تشخیص شو.
اعلامیه زیاتوي: «که څه هم دا د ناروغۍ یو شدید ډول دی، خو سرطان د هورموندرملنې لپاره حساس دی، چې دا درملنه مؤثره کولی شي.»
د اعلامیې له مخې، بایډن او کورنۍ یې دا مهال له ډاکترانو سره د درملنې مختلفې لارې ارزوي.
جو بایډن، چې له ۲۰۲۱ تر ۲۰۲۵ پورې د امریکا ولسمشر پاتې شوی، وروسته له هغه له ۲۰۲۴ ټاکنو نه لاس واخیست چې د نوموړي د عمر او رواني وړتیاوو په اړه پوښتنې راپورته شوې.
