د جرمني حکومت پرېکړه کړې چې په پاکستان کې مېشت ۵۳۵ افغان وګړي جرمني ته ولېږدوي.
د راپورونو له مخې، دا کسان هغه افغانان دي چې یا یې پخوا له جرمني ځواکونو سره کار کړی او یا هم د طالبانو حکومت له لوري له ګواښ سره مخ دي.
دا د پناه غوښتنې پروګرام د جرمني د پخواني حکومت لهخوا د طالبانو حکومت له بیا واکمنېدو وروسته پیل شوی و؛ خو د نوي صدراعظم فریدریش مرتس له راتګ سره د دې پروګرام یوه برخه ځنډول شوې وه.
پاکستان دغو افغانانو ته د قضیو د حل لپاره د روان کال تر پایه وخت ورکړی، او جرمني چارواکي هڅه کوي چې ډېری چارې د ډسمبر تر میاشتې بشپړې کړي.
