اروپایي رسنیو ویلي چې جرمني هغو ۶۵۰ افغانانو ته چې د دې هېواد د بیا مېشتېدو په لېست کې شامل دي، وړاندیز کړی چې که له جرمني ته د تلو پلان نه تېر شي؛ نو په بدل کې به ورته زرګونه یورو ورکړل شي.
یادې رسنۍ وایي، چې تر دې دمه یوازې ۶۲ افغانانو دغه وړاندیز منلی دی.
یاد کسان د ۱۹۰۰ هغو افغانانو له ډلې شمېرل کېږي چې جرمني ورته پخوا د منلو ژمنه کړې وه او دا مهال په دریمو هېوادونو کې په تمه ژوند کوي.
د جرمني د بهرنیو چارو وزارت یوه ویاندې ویلي چې له نورو مستحقو افغانانو سره هم اړیکې روانې دي او ممکن یو شمېر نور کسان هم دغه وړاندیز ومني.
په ورته وخت کې اندېښنې شته چې پاکستان ښايي د ډسمبر له پای وروسته هغه افغانان له هېواده وباسي چې جرمني یې د پناه غوښتنې پروسې منلو ته حاضر نه دي.
