د ایران او امریکا ترمنځ د عمان په پلازمېنه مسقط کې د مقدماتي خبرو اترو وروسته، دواړو هېوادونو توافق کړی چې راتلونکې اونۍ د اټومي مذاکراتو نوي دور ته دوام ورکړي.
د ایران د بهرنیو چارو وزارت په یوه اعلامیه کې ویلي، چې لومړۍ دوره د یو جوړوونکي او متقابل درناوي فضا کې ترسره شوې ده.
په دې غیرمستقیمو مذاکراتو کې، د ایران او امریکا لوړپوړو مذاکراتي استازو عباس عراقچي او سټیو ویتکاف د خپلو حکومتونو نظرونه د عمان د بهرنیو چارو وزیر بدر بن حمد البوسعیدي له لارې تبادله کړل.
د عمان د بهرنیو چارو وزارت هم په یوه اعلامیه کې تایید کړې چې دواړو خواوو موافقه کړې چې مذاکرات په راتلونکې اونۍ کې ادامه پیدا کړي.
