د طالبانو حکومت د بهرنیو چارو وزیر مولوي امیر خان متقي نن په کابل کې د قطر د دولت له نوي سفیر مردف القاشوطي څخه باورلیک تر لاسه کړی.
القاشوطي تر دې وړاندې په کابل کې د قطر د شارژدافیر په توګه دنده ترسره کړې وه.
مولوي متقي د افغانستان او قطر اړیکې تاریخي بللې او ټینګار یې کړی چې دواړه هېوادونه باید د سوداګرۍ، اقتصادي همکاریو او د افغان کاري ځواک د استولو په برخو کې له شته فرصتونو اعظمي ګټه واخلي.
د قطر نوي سفیر مردف القاشوطي د دواړو هېوادونو اړیکې ژورې او لرغوني بللې او ژمنه یې کړې چې د دوه اړخیزو اړیکو د لا پیاوړتیا لپاره به هڅې زیاتوي.
نوموړي ټینګار کړی چې قطر به د منځګړیتوب په برخه کې خپل رول ته ادامه ورکړي او د افغانستان او نړیوالې ټولنې د دریځونو د نږدې کولو په برخه کې به هڅې جاري وساتي.
