العربیه تلویزیوني شبکې د یوه اسراییلي چارواکي له قوله راپور ورکړی چې د ترکیې په همغږۍ د احمد شرع په مشرۍ د سوریې د حکومت استازو له اسراییلي لوري سره لیدنه کړې.
یاد چارواکی وایي، د سوریې حکومت د ښه نیت نښې ښودلې او اسراییل به هم ورته چلند ولري.
هغه زیاته کړې چې سوریه یو مهم هېواد دی او د ابراهیمي تړونونو له لارې د دمشق ګډون کولی شي سیمهییز وضعیت بدل کړي.
دغه اسراییلي چارواکي ویلي، امریکا د سوریې د نوي حکومت د بریا ملاتړې ده او له ترکیې سره یې د دغه بهیر د بریالیتوب لپاره همکاري کړې.
همداراز، ټینګار شوی چې د اسراییلي ځواکونو تر واک لاندې سیمو کې باید د وضعیت تر ثباته کوم برید یا تحرک ونهشي.
