په اسلام اباد کې د طالبانو سفارت په پاکستان کې د حکومت ضد لاریونونو کې د افغان کډوالو ګډون رد کړ.
د طالبانو سفارت څخه خپره شوې خبرپاڼه وایي، په حکومت ضد لاریونونو کې د افغانانو د ګډون په اړه د کورنیو چارو د وزیر او نورو پاکستاني چارواکو وروستۍ څرګندونې ښايي په دغه هېواد کې د افغان کډوالو د ځورولو لپاره یوه بهانه وي.
تر دې وړاندې د پاکستان د کورنیو چارو وزارت افغان کډوال په حکومت ضد لاریونونو کې په ګډون تورن کړل او ویلي وو چې په دغو مظاهرو کې لږ تر لږه ۳۷ افغان کډوال نیول شوي دي.
د پاکستان د اطلاعاتو او کلتور وزیر هم ویلي چې د تحریک انصاف ګوند په مظاهرو کې افغان کډوالو هم برخه اخیستې وه.
د پنجاب حکومت بیا ویلي چې په مظاهره کې د ګډون کوونکو افغانانو هویت به ډیر ژرپه ډاګه کړي.
